صوتي خشن تقيل لما يطلع بيطلع كأنو طالع من صدر شب مش من حنجرة بنت، اول ما افتح تمّي الناس بتتلفت وبعيونها استغراب وبس اسكر بفهم انو اسهل اشي عندهم يصنفوني غلط، شكلي انثوي بكل التفاصيل ولبسي انثوي وحركاتي عادية بس اول كلمة بتخرب كل الصورة، صرت اتربك قبل ما احكي واحسب النفس واحاول ارفع النبرة بس الصوت بيرجع ينزل غصب عني كأنو عم يعاندني، بالجامعة كنت قاعدة بالمحاضرة سنة كاملة تقريبا وما حد سمع صوتي لانو كل مرة بدي اسال او اشارك بتجمد وبتخيل الضحك والهمس، في دكاترة حسبوني خرسى وطلاب فكروني متكبرة او معقدة وانا بس كنت عم احمي نفسي من نظرة وحدة، لما اضطر احكي بالتلفون الكارثة اكبر، اول ما ارد السلام الطرف التاني يحكي تفضل استاذ وبس اصلحلو بصير صمت تقيل وبحس حالي فضيحة ماشية، مرضي مش خيار ومش شي بقدر اغيرو بسهولة بس الناس ما بتحب التفسير وبتحب الاحكام السريعة، في مواقف حسيت انوثتي كلها انهارت بكلمة وحدة وصرلي اتجنب التعارف واتجنب النقاش واتجنب اي مكان بدو صوت، صرت اكتب اكتر ما احكي وابعت رسائل بدل ما اتصل واختفي لما يطلبو مني احكي قدام مجموعة، الجارح انو في ناس تضحك بدون قصد وتقول صوتك قوي وذكوري وانا من جواي عم اتكسر بس ببتسم، مرات بحس حالي محبوسة بجسم مش متوافق مع صوتو وكل يوم عم اتعلم كيف اعيش بنص صورة الناس رسمتها عني بدون ما يسمعوني عن جد، يمكن هالاعتراف صادم لانو المجتمع بحب يحط الانثى بقالب معين وصوت معين واي خروج عنو بيصير وصمة، وانا تعبت من الصمت اللي اخترتو حماية لنفسي وتعبت من صوتي اللي ما اخترتو بس مضطرة احملو معي بكل مكان ومع هيك لسا عم حاول اصدق اني كاملة حتى بهالغلطات والكسور.