المطر بخوفني مش برتاحلو ولا بحبو ولا بحس فيه رومانسي زي ما الناس بتحكي، اول نقطة مي بتقع بحس قلبي وقع معها وبصير جسمي مشدود كاني مستني مصيبة، صوت الرعد بيشلني وبخليني صغير من جواتي وبصير احسب الثواني بين اللمعة والدوي وكأني بعدّ على قنبلة، العواصف عندي مش جو ولا مزاج شتا هي اعلان رعب، بس السماء تعتم والهوى يقوى بحس انو الدنيا عم تنقلب عليّ شخصيا، بكره نشرات الطقس وبكره التطبيقات اللي تبعتلي تنبيه انو في منخفض جاي، بحاول اتخبى بالبيت واسكر الشبابيك كويس واطفي الاضواء وبقعد بعيد عن الشبابيك كأني خايف حدا يشوفني من السما، لما المطر يقوى بحس السقف رح يوقع والارض رح تبلعني وبصير اتخيل سيناريوهات غبية بس بالنسبة الي حقيقية، في ليالي كاملة ما بنام بس لان في ريح وبسمع صفيرها وبحسها عم تنادي اسمي، الناس بتضحك لما احكي هيك وبتقولي عيب هاد مطر خير، بس بالنسبة الي الخير هاد بيفتح باب هلع ما بسكر، صرت الغي مشاوير واعتذر عن شغل ولقاءات بس لانو في احتمال مطر او عاصفة ترابية، الجو بيتحكم فيّ اكتر من اي انسان وصرت حاسس حالي ضعيف قدام غيمة، اكتر اشي جارح لما حد يحكيلي استرجل او كبر عقلك كأنو الخوف خيار، جسمي ما بسمع المنطق ودماغي بيخونني وبيصدق انو النهاية قريبة، يمكن الكل يبحث عن هالموضوع لانو في خوف مش مفهوم ولا محبوب ولا اله تعاطف، وانا عايش مع طقس داخلي اعنف من اي عاصفة برا وبحاول اقنع حالي كل مرة انو السماء ما الها نية تأذيني بس اول رعد برجّعني نقطة الصفر وبخليني ارتجف واغلط بالحكي وافقد السيطرة شوي شوي.