أنا كنت السبب بانهيار سمعة بنت بريئة بحارتنا بس عشان كبريائي انجرح، الموضوع بلش تافه وغبي، كنت معجب فيها من بعيد وكل ما تمر قدامي قلبي يدق بسرعة وكنت متخيل حالي فارس أحلامها، جمعت جرأتي وحكيت معها بطريقة محترمة قدام باب بيتهم، ردت عليّ بهدوء وقالتلي إنها ما بتفكر بهيك أمور وهلأ بدها تركز على دراستها، ما غلطت ولا جرحتني، بس أنا حسيت ساعتها إنو انكسرت قدام حالي، رجعت عالقعدة مع الشباب وحكيت كلمتين بس عشان أبرر لنفسي، قلت إنها كانت تبعثلي إشارات وإنها حاولت تفتح معي موضوع قبل، الشباب مسكوا الخيط وكبروا الحكي، وأنا بدل ما أوقفهم ضحكت وسكت، بعد كم يوم صارت القصة إشاعة كاملة إنها كانت تحكي معي بالسر وإنها مو قد هالسمعة اللي الناس شايفتها فيها، الإشاعة كبرت أسرع من النار بالهشيم، أمها بطلت تطلعها كتير، أبوها صار يمشي وراها، وكنت كل ما أشوفها تمشي مطأطية راسها أحس بشي يخزني بس أكابر وأقول لنفسي ما إلي دخل الناس بتحب تضخم، الحقيقة إنو أنا اللي زرعت أول بذرة، أنا اللي اخترت أكون جبان وما أعترف قدام الشباب إنها رفضتني باحترام، الموضوع وصل لدرجة إنو خطبة إجتها واتلغت لأن العيلة سمعت كلام، وكنت أنا واقف بالزاوية ساكت كأني مالي علاقة، كل ما أتذكر نظرتها لما كانت تمر قدامي وفي عيونها سؤال كبير ليش هيك بصير معي بحس إني أوطى من أي كلمة تنقال، أنا ما لمستها ولا أذيتها جسدياً، بس يمكن اللي عملته أقسى، كسرت سمعتها بكلمة وخلّيت مجتمع كامل يشكك فيها، والمصيبة إنو لو انكشف دوري يمكن أهلي نفسهم ما يصدقوا إني كنت بهيك دناءة، لهلأ لما بسمع حدا يحكي عن الشرف والسمعة بنقبض، لأني بعرف قدّيش سهل يتدمر كل شي بكلمة طالعة من شاب أناني حس حاله مكسور فقرر يكسر غيره معه، وهاي الحقيقة اللي ما بجرؤ أحكيها لحدا، إني ظلمت إنسانة عشان غروري وما كان عندي شجاعة أتحمل كلمة لا.