انا يمكن اكتر انسان عنده فوبيا غريبة لدرجة بتتحكم في حياتي يوم ورا يوم، يعني في ناس عندهم خوف من اماكن ضيقة او من الدم او من الحشرات، بس انا الموضوع عندي صار زي لعنة، اي مكان ضيق او مظلم او حتى مزدحم بحس انه بيخنقني، قلبي يدق بسرعة، نفسي ينقطع، وبحس حالي رح اطيح من طولي، وكل ما حاولت اشرح للي حوالي شو بصير معي بيضحكو علي وبيقولو "كبرت الموضوع"، بس والله الشعور مش بسيط، بحس انه الموت اقربلي من اي شي وقتها، كأنه الحيطان بتسكر عليّ او الهوا بنسحب من المكان

بذكر اول مرة حسيت بهيك خوف كان وانا صغير، لما انحبست بالصدفة بالحمام، كنت وقتها لحالي بالبيت، وضليت ادق عالباب واصرخ وما حدا رد، وقعدت يمكن نص ساعة بس بالنسبة الي كانت كأنها سنين، من يومها صار عندي خوف مرضي من كل شي مسكّر او ممكن يحبسني، حتى لو قعدت بمصعد مع ناس بحس اني محاصر وبتمنى الباب يفتح بسرعة، مرات بمشي عالسلالم عشر طوابق بس ما اركب المصعد، وبالليل صرت ما اقدر اطفي الضوء كامل، لازم يضل فيه لمبة صغيرة مولعة، لانه العتمة الكاملة تخليني انهار

المشكلة مش بس بالخوف نفسه، المشكلة انه الفوبيا هاي عم تاخد مني فرص، يعني في سفرات ما رحتها لانه فيها طيارة وانا عندي رعب من فكرة اني محبوس بقلبها، في شغل ضيعته لانه المكتب تبعهم بالطابق العشرين وانا مش قادر اتخيل اركب المصعد كل يوم، في ناس بعدو عني لانه بيشوفوني غريب بتصرفاتي، كل حياتي صارت تدور حوالين كيف اتجنب الاشياء الي بخاف منها، لدرجة اني بحس اني مش انا الي عايش حياتي، الفوبيا هي الي بتتحكم فيني وتقرر عني

يمكن في ناس يعتبروها تفاهة او بس شوية خوف، بس انا عايشها كجحيم حقيقي، كل يوم صراع، كل دقيقة قلق، وكل موقف ممكن يبين عادي عند الناس هو عندي معركة مع نفسي ومع عقلي ومع جسمي.