انا عندي فوبيا غريبة يمكن ما كتير ناس سامعين عنها، بخاف من البالونات، ايوه بالونات العيد والمناسبات واللي الاطفال بيطيروها بالسما، بالنسبة لغيري فرحة واحتفال، بس بالنسبة الي كابوس حقيقي، كل ما اشوف بالونة قريبة علي او بسمع صوت فرقعتها بحس قلبي وقف، اذني تسكر، جسمي كله يرتجف، كأني عايش لحظة انفجار مش مجرد بالونة بسيطة، وبصير اتجنب أي مكان فيه احتمالية يكون فيه بالونات

هالفوبيا بلشت من وانا صغير، كنت بحفلة عيد ميلاد، وكان في ولد ماسك بالونة وعم يضغط عليها بيده عشان يخوفنا، وفجأة فرقعت بوجهي، الصوت كان قوي لدرجة حسيت راسي رح ينفجر، ومن يومها صار عندي خوف مرضي، كل ما شفت بالونة حتى لو من بعيد، عقلي يرجعني لهاي اللحظة، وصرت اهرب من أي مناسبة فيها بالونات، حتى حفلات العيلة صرت اعتذر وما احضرها

الاغرب ان الناس يستهينو بالموضوع، يقولو "شو يعني؟ بالونة!"، بس انا بالنسبة الي هو خوف يشلني، بحس البالونة زي قنبلة صغيرة بتمشي بين الناس، وانا مش قادر ارتاح طول ما هي موجودة، لدرجة اني صرت ما اقدرش احضر أعياد ميلاد ولادي الصغار بدون ما اطلب من الكل ما يجيبو بالونات، وبصير ابرر اني ما بحب الفوضى، بس الحقيقة انه انا مرعوب

المشكلة انه هالفوبيا حرمتني من ابسط اللحظات العائلية والاجتماعية، بتخليني شخص غريب قدام الناس، وبتخليني احس بالعار من نفسي، كل يوم بحكي: معقول اظل طول حياتي اخاف من شغلة سخيفة زي بالونة؟ بس لما يجي الموقف، الخوف يسيطر على كل عقلي وجسمي، وما بقدر اعمل شي غير الهروب.