انا مرات بحس اني انسان منافق حتى من غير قصد، يعني قدام الناس بعاملهم بلطف وبضحك وببين اني صاحب القلب الواسع والنية الطيبة، بس بيني وبين نفسي بكون مليان احكام، يمكن ما بطلعها بصوت عالي بس بتغلي بدماغي، بكون قاعد مع شخص وبس يبلش يحكي عن نجاحه او شغله الجديد، ببتسم وبقله مبروك من قلبي، بس جوّاي صوت بيقلي: "ليش هو نجح وانت لأ؟" او "هو مش قدك ومع هيك سبقك"، وبرجع عالبيت مكسور لاني ما بدي اكون هيك، ما بدي اكون الغيور الحقود، بس مش قادر اوقف هالمقارنات.

حتى بعلاقاتي القريبة مرات بتناقض، بحكي لاصحابي "انا دايمًا جنبكم وبدعمكم"، بس يمكن اكون بنفس اللحظة مش قادر ابلع فكرة انهم سبقوني بخطوة، بحاول اعوض باني ابين قدامهم المثالي والطيب، بس بآخر الليل لما اكون لحالي بعترف لنفسي اني عايش بشخصيتين، واحد بضحك وبيحب وبيدعم، وواحد تاني متألم، ناقم، وبيكره احساس النقص الي ما بيروح.

الموضوع ما خلاّني بس أعيش صراع داخلي، لأ كمان صار يبعدني عن حالي، بطلت اعرف مين انا فعلًا، هل انا الطيب الي الكل بشوفه، ولا الاناني الي جواي؟ وهاد التناقض صار ينهكني، وبتمنى يوم اقدر اكون صريح مع نفسي ومع غيري من غير ما اخاف ينكشف وجهي التاني.