بص بقى.. انا من فترة كنت مخطوب لبنت شكلها ملاك، والله كنت فاكر اني مسكت السما بايديا، أهلها ناس محترمين كده من بره، وكلامهم حلو وكله ذوق، بس سبحان الله يا أخي، اللي بيبان من بره مش هو اللي جوا.
الاسبوع اللي فات حصلت حاجة خلتني أعيد حساباتي كلها، أختها كانت متجوزة واحد محترم جدًا، راجل عالأصل متربي، ومكنتش عمري سمعت منه كلمة وحشة عنهم، فجأة لقيت الدنيا اتقلبت، البنت رفعت عليه قضية خلع، واهلها بيجرّوه في المحاكم عشان القائمة، والشقة، والتمليك، وبيقولوا عليه سرق ذهبها ومضربها، مع إن الراجل والله كل الناس في المنطقة عارفين انه صرف دم قلبه عالشقة وعالفرش وكل حاجة باسمها!
الموضوع قلب فيلم درامي، بس من النوع السخيف اللي يخليك تقول الحمدلله إنك لسه عندك فرصة تهرب قبل ما تتورط.
أنا بقى لما شفت اللي حصل، بدأت أربط حاجات كده كانت بتضايقني من غير ما أفهمها، زي مثلًا إن خطيبتي كانت دايمًا تدخلني في كلامهم العائلي وتسمع كلام أمها في كل حاجة بالحرف، حتى في حاجات تخصنا احنا بس، يعني لما اختلفنا مرة على شغلة بسيطة في الفرح، أمها هي اللي قررت، مش هي!
وساعتها ضحكت وعديتها، قلت دي عيلة مترابطة… بس دلوقتي؟ لأ، أنا شايفها تحكم وتسلّط، واللي مش ماشي معاهم يمسحوا بيه الأرض.
أنا مش ضد الست تاخد حقها لو في ظلم، بس لما يتحول كل خلاف بسيط لسلاح وتهديد بـ “القائمة” و “التمليك” و”هنرفع قضية”، لأ كده في مرض جوه النفوس.
حسّيت إن الدنيا بتقولي “اهرب وانت لسه قادر”. والله يا أخي من يوم ما سمعت اللي حصل وأنا قلبي مش مرتاح، كل حاجة فيها بقت تقيلة عالنفس، نظرتها بقت مش زي الأول، بقيت أتخيلها لو حصل بينا حاجة بسيطة تعمل فيا اللي أختها عملته في جوزها، وألاقي نفسي متكبل في محكمة ومطلوب مني أدفع تمن حياتي اللي لسه ما بدأتش.
فـ النهاردة، وأنا قاعد لوحدي، كنت ببص في المراية وقلت لنفسي بصوت عالي: “انت اتسرعت يا ابني، ربنا نجاك قبل ما تتعلّق أكتر”.
مش عيب الواحد يعترف إنه غلط، العيب إنه يكمل وهو شايف الكارثة قدامه.
يمكن يقولوا عني جبان أو انسحبت في آخر لحظة، بس أهو جبن شريف أحسن من زواج مذلّ.
أنا خلاص قررت أفسخ الخطوبة قبل ما تتعقد أكتر، وهقولها بالحسنى، من غير فضايح ولا مشاكل، بس من جواي حاسس إني نجوت من مصيبة كانت ممكن تخلص عليّ.