والله يا اخي انا مش قادر افهم كيف هالكون ماشي، يعني عنجد بحس اني بضيع لما احاول افهم قصة الرزق، كل يوم بفكر فيها وبتعب راسي وقلبي مع بعض، يعني انا بحاول اعيش صح، بحاول ما اظلم حدا، بحاول اشتغل بضمير، بس لما اشوف حالي بتعب وبناضل وبسعى وبجتهد وبرجع آخر الشهر مش مكفي حتى أبسط احتياجاتي، وبنفس الوقت بشوف ناس ما بتتعب، ما بتسهر، ما بتعاني، ورزقها واسع وبفتح الله عليهم من كل صوب، بصير بدي أصرّخ واسأل ليه؟! شو سر الرزق؟! يعني في ناس بشوفها خلقوا ومعاهم نصيب من الدنيا، وناس خلقوا وكل شي ضدهم، واحد بعيش كل عمره بالحلال وبدعي وبصلي وبصوم وبيتبرع وبتصدق وبيعمل خير وبساعد الناس وما برجع عليه خير الدنيا، وواحد تاني ما بعرف منين بتيجي معه، رزقه مفتوح كأنه الدنيا صارت تشتغل تحت أمره، بحس مرات اني راح أنجن من كتر التفكير، ليه الرزق مش ماشي على ميزان العداله؟ ليه الطيب ممكن يضل فقير، والعاصي ممكن ينام فوق المال؟ بحاول أقنع نفسي انو الرزق مش بس مصاري، بس برجع وبقول طب ليه أنا بدي أضل أواسي حالي بهاي الجملة؟! يعني ماشي الرزق مش فلوس بس كمان مو معقول يكون الرزق اللي إلي دايمًا بالهم والضغط والتعب، طيب وين راحة البال؟ وين البركة؟ وين لحظة “الحمد لله عن جد” اللي بتطلع من القلب مش من اللسان؟ مرات بقول يمكن انا اللي ما بعرف اسعى صح، يمكن ربنا شايف شي انا مش شايفه، يمكن الرزق مش وقته، يمكن لو اجاني الرزق راح يضرني بدل ما ينفعني، بس كمان ما بقدر امنع نفسي من الغصّة لما بشوف حالي عم بشتغل كأنّي آلة، وبنفس الوقت في ناس عايشه بترف ومش عامله شي، يعني لما أشوف واحد طول اليوم بكيف وبضحك ومبسوط والدنيا بوجهه وانا عم فكر كيف أغطي فواتيري، بحس الدنيا ما فيها مقياس، ولا عدالة، يمكن فيها اختبار، يمكن فيها توزيع غريب بس محسوب عند ربنا بطريقة احنا ما بنفهمها. بس بصدق مرات بحس اني بدي أصرّخ واقله يا رب بس فهمني، فهمني شو السر، انا مش معترض بس بدي أعرف، ليه الرزق مرات يجي لناس ما بتقدّر، وينحرم منه ناس بتتمنى لقمة بالحلال، ليه الصادق دايمًا عليه الصعب، ليه اللي بيحب الخير لغيره بيعيش دايمًا ناقص؟ بحاول أواسي نفسي انو يمكن الرزق مش بالدنيا، يمكن الجائزة الحقيقية بعدين، بس القلب البشري ما بيسكت، بضل بدور على السبب، بضل بسأل، يمكن في شي اسمه بركة، ويمكن الرزق أوسع من مصاري، يمكن راحة الضمير بحد ذاتها رزق، بس لما يكون جيبك فاضي وكرامتك على المحك، صعب تشوف المعنى بهالكلمات، عنجد تعبت وبتمنى بس اعرف، شو سر الرزق فعلاً، ليه بيتوزع بهالطريقة اللي عقلنا ما بيستوعبها.