بصراحة انا بكره فكرة إن البنت لازم تبان دايمًا هادية ومهذبة ومابتغلطش وكأننا كائنات معمولة عشان نرضي المجتمع، انا لو عايزة أزعق هزعق ولو متضايقة هقول متضايقة مش همثل إني تمام، زهقت من إن كل تصرف ليا بيتقاس على ميزان "دي بنت كويسة ولا مش كويسة"، يعني لو خرجت مع صحابي يقولوا فقدت أنوثتها ولو قعدت في البيت يقولوا كئيبة ومملة، لو اشتغلت يقولوا راجل ولو اهتميت بنفسي يقولوا سطحية، ولو رفضت جوازة يقولوا مغرورة، أنا مش فاهمة هو امتى بالظبط البنت تبقى تمام في نظر الناس؟! المشكلة إننا اتربينا نحاول نرضي الكل بس محدش قالنا ازاي نرضي نفسنا، أنا عايشة في دايرة غريبة بين إني عايزة أعيش بطريقتي وبين خوف الناس من فكرة "بنت مستقلة"، كل حد بيحاول يوجّهني كأني مشروع تعديل سلوك، وانا مش مشروع لحد، انا انسانة ممكن اغلط وممكن اكون صح، بس مش عايزة كل غلطة تتحول لمحاضرة عن الشرف والدين والعيب، انا مش ناقصة وصاية، ومش عايزة حد يفهمني أكتر من نفسي، مش عيب أبقى بنت عندها رأي، مش عيب أقول لأ، ومش عيب أكون حرة حتى لو دا مضايق نص الدنيا، يمكن أكتر حاجة وجعتني إن في بنات كتير متصالحين مع القهر وبيقولوا "هو كده المجتمع"، طب ليه نفضل نسكت؟ ليه دايمًا نختار السلامة على الحقيقة؟ خلاص أنا قررت أعيش بطريقتي حتى لو هخسر كل حاجة، بس على الأقل هكون نفسي مش النسخة اللي الناس عايزاها مني.