أنا بعترف إني من سنين بعرف سر لو طلع ممكن يقلب عيلتنا كلها فوق تحت، أبوي قبل ما يتوفى حكى معي لحالي وقاللي إنه أخوي اللي كل عمرنا بنعتبره أخونا من الأب والأم بالحقيقة مش ابنه، وإن أمي كانت حامل فيه قبل زواجهم وهو عرف واختار يستر عليها ويربيه باسمه،

وقتها كنت مصدوم ومش عارف ليش اختارني أنا بالذات حتى يحملني هالسر، وطلب مني ما أحكي لحد حتى بعد موته، بالبداية التزمت لأنه حسيت إنه هاد آخر طلب إله، بس بعد ما مات بدأت الأمور تتعقد بشكل ما كنت متوقعه، صار في ميراث وعقار وأراضي وخلافات، وأخوي كان أكتر واحد بحكي عن حقه وعن إنه ابن أبوي ولازم ياخذ نصيبه كامل،

وأنا كل مرة أسمعه بحس إني قاعد بشوف كذبة كبيرة تمشي قدامي وما بقدر أوقفها، قانونيًا ووثائقيًا هو ابنه وكلشي باسمه ومش أنا اللي بحدد حقوق الناس، بس داخليًا الموضوع مش هيك بسيط، لأنه عندي أخوات صاروا يبيعوا ذهبهم ويدفعوا ديون حتى يحافظوا على حصصهم بالعقار،

وهو طالب حصته بدون ما يعرف أصلًا إن الرجل اللي عم يورثه ما كان أبوه البيولوجي، والأسوأ إنه كان دايمًا أقرب واحد لأبوي، وأبوي كان يعامله أحسن منا كلنا، يمكن لأنه كان خايف يوم يحس إنه مختلف، وأنا مرات أغار من هالإشي وأرجع أستحي من نفسي، أمي للحين عايشة وأنا مش عارف إذا هي بتعرف إن أبوي حكالي أو لأ،

وكل ما أقعد معها بحس إنها بتقرأ بوجهي، بفترات الخلاف بيني وبين أخوي جتني لحظات وسخه فكرت أحكيله الحقيقة بس حتى أوجعه، وبعدين خفت من نفسي أكتر من السر نفسه، لأنه إذا الحقيقة صارت سلاح بوقت غضب بكون أنا أسوأ من الكل، وفي نفس الوقت بحس إني عايش دور مش إلي،

أنا مش أبوه ومش أمه ومش قاضي، ليش انحط على كتفي قرار مين يعرف أصله ومين ما يعرف، الناس بتحكي الحقيقة دايمًا أحسن بس مش كل حقيقة بريئة، في حقه يعرف أصله من جهة، وفي حق أمي بسترها، وفي وصية أبوي، وفي بيت كامل ممكن يتفجر، وأنا صرت أكره المناسبات العائلية لأنه كل مرة أشوفهم قاعدين سوا بتذكر إنه أنا الوحيد اللي شايف طبقة ثانية من القصة،

وحتى صور أبوي وأخوي سوا صرت أشوفها بطريقة مختلفة، والغريب إني بعد كل هالسنين صرت مقتنع إنه الأب الحقيقي هو اللي ربّى ووقف وصرف وحب، بس برضه الدم مش تفصيل صغير زي ما بنحاول نقنع حالنا، وأنا عايش بين فكرتين متناقضات وكل وحدة فيهم منطقية، وأكتر شي مرعب إنه يمكن أموت أنا كمان ويضل السر معي ويندفن،

ويمكن هاد أصلًا أرحم حل رغم إنه حاسس إني بسرق من إنسان معلومة تخصه هو قبل ما تخص أي حدا ثاني.