أنا من فترة طويلة عايش بشعور غريب ما بعرف أوصفه لحدا، كل الناس حواليّ شايفيني شخص اجتماعي وبضحك وبمزح وبطلع وبشتغل وبحكي طبيعي، بس الحقيقة إني بخاف بطريقة مش طبيعية من فكرة إني أختفي من حياة الناس وما حدا ينتبه، مش قصدي أموت ولا اشي، قصدي أصير الشخص اللي كان موجود وبعدين فجأة ما عاد حدا يسأل عنه،

مرات بفتح المحادثات القديمة وبشوف ناس كنت أحكي معهم كل يوم وصار بينا سنين بدون كلمة، وبسأل حالي إذا بكرا بطلت أنا أبادر مين رح يتذكرني أصلاً، جربت مرة أسبوع كامل ما أبعت لحدا ولا أسأل عن حدا وانصدمت قديش الدنيا كملت عادي، وقتها حسيت إني يمكن طول عمري أنا اللي كنت ماسك العلاقات من طرف واحد،

ومن يومها صرت أعمل حالي مش فارقة معي بس من جوا الموضوع بوكل براسي، والأسوأ إني صرت أختبر الناس بدون ما يعرفو، بتأخر بالرد، ما بسأل، بختفي يومين، وبراقب مين رح يدور علي، وبعرف إنه التصرف يمكن طفولي بس صرت محتاج دليل إني مهم عند حدا مش مجرد شخص لطيف وجوده حلو وغيابه عادي،

مرات بفكر يمكن المشكلة مش بالناس ويمكن أنا عطيت قيمة للعلاقات أكبر من حقيقتها، بس برضو صعب الواحد يقتنع إنه ممكن يكون محاط بعشرات الأشخاص وبنفس الوقت لو سكت أسبوع ما حدا ينتبه إنه ساكت.