فيه حاجة عمري ما قلتها لحد، أنا بخاف من الأسانسير بطريقة بتخليني أبان قدام الناس إني بتدلع، الموضوع مش مجرد إني مش بحبه، أنا أول ما الباب يقفل بحس صدري اتقفل معاه وببدأ أسمع صوت نفسي عالي ودماغي تقولي طب لو وقف، طب لو النور قطع، طب لو محدش سمعك،

وبدل ما أشرح للناس بطلع أي حجة وأقولهم أنا بحب السلم عشان الحركة، وفي الشغل ممكن أطلع ست أو سبع أدوار على رجلي بس عشان محدش يشوف منظري لو ركبت وبدأت أتوتر، الغريب إن الخوف ده مكانش عندي وأنا صغير، بدأ بعد مرة الأسانسير وقف بيا كام دقيقة ومن ساعتها دماغي ربطت المكان كله بالإحساس ده،

والأسوأ إن حتى لما أكون مع حد بحبه وبثق فيه مش برتاح، بالعكس بحس إني لازم أخبي توتري عشان ما أحرجش نفسي، بقيت حافظ أماكن السلالم في كل مول ومستشفى ومبنى بروحه، ولو حد قالي تعالى مكان وأنا عارف إنه دور عالي ساعات بعتذر من غير ما أقول السبب، واللي يقهر إن عقلي عارف كويس إن ملايين الناس بتركب أسانسيرات كل يوم ومبيحصلش حاجة،

بس جسمي كأنه مش مقتنع بأي منطق، والسؤال اللي فعلاً محيرني هل الخوف لما الواحد يفضل يهرب منه بيكبر أكتر، ولا أنا صح إني متجنب الحاجة اللي بتخليني أحس إني هموت كل مرة رغم إني عارف إني غالباً مش في خطر حقيقي.