صارلي مدة نعيش حاجة غريبة برشا وما نعرفش إذا الناس الكل يصيرلها كيفي ولا لا، نلقى روحي مرات في وسط قعدة فيها صحابي والناس تضحك وتحكي وأنا فجأة يجي إحساس كأني موش موجودة معاهم، نسمع أصواتهم أما نحس روحي بعيدة، نركز في وجوههم ونقول بيني وبين روحي كيفاش الناس هاذم عندهم حياتهم وأسرارهم ومشاكلهم وأنا نعرف منهم كان الجزء اللي يحبوا يوريوه،

وبعدها يبدأ مخي يمشي بعيد ونحس الدنيا الكل غريبة شوية، ما نطيحش ولا نفقد الوعي ولا حتى يبان عليا شيء، نكمل نضحك ونرد عادي، أما داخلياً نحس كأني نتفرج على حياتي من بعيد، الحكاية تدوم دقائق وبعدها نرجع عادي، ووليت نخاف منها أكثر من الإحساس نفسه،

يعني أول ما تبدأ نقول هاو رجعت ونتوتر فتزيد أكثر، وحكيت مرة لصديقة قالتلي إنتي تفكر برشا وما عندك حتى شي، يمكن عندها حق، أما صعيب تفسر لحد إحساس ما هوش ألم وما هوش دوخة وما هوش حزن واضح، هو فقط شعور إن كلشي للحظة يفقد المألوف متاعو، واللي يقلقني أكثر إني في بقية الوقت نعيش طبيعي ونخدم ونخرج ونضحك،

يعني حتى أنا مرات نقنع روحي إنها حاجة تافهة، وبعدها كي ترجع نحس قدّاش هي ثقيلة رغم أنها ما تتشافش.