أنا يمكن الناس تعتبرني شخص قوي زيادة عن اللزوم، لكن الحقيقة إني اتعلمت أكون كدا لأنو من بدري شديد كل زول حولي كان متوقع مني أتصرف بعقل، لو حصلت مشكلة يقولوا خلوه هو يتصرف، لو زول اتضايق يقولوا إنت افهمو، لو حصل خلاف في البيت أنا البهدّي الناس،

ومع الزمن بقيت فعلاً الزول البيلم الموضوع، لكن المشكلة إنو ما في زول سألني أنا لما أتعب بمشي وين، بقيت حتى لما تحصل لي مصيبة أول تفكير عندي ما بيكون أنا حاسس بشنو، بيكون كيف أخلي الناس ما تقلق، وأحياناً بعد ما المشكلة تنتهي وكل زول يهدأ ألقى نفسي بالليل صاحي وما عارف أنا ليه مخنوق،

كأنو المشاعر بتستنى دورها وما بتلقاه إلا بعد كل الناس تمشي، وحصل مرة كنت في ظرف صعب شديد وبرضو الناس جوني بمشاكلهم وأنا قعدت أسمع وأحل ليهم، وبعدها ضحكت من نفسي وقلت معقول أنا حتى وأنا واقع لازم أمثل دور الحيطة، الغريب إنو لو يوم قلت ما قادر الناس تستغرب وتقول مالك إنت ما كدا،

ودي الجملة ذاتها بتخليني أرجع أسكت، كأنو القوة البنيتها عشان أحمي نفسي بقت وظيفة مفروضة علي، وأنا مرات بس نفسي زول يقول لي ما محتاج تكون العاقل الليلة، لكن حتى لو قالوها لي يمكن ما أعرف أعمل شنو بعدها.