ما أدري إذا فيه أحد يمر بنفس اللي أمر فيه، بس أنا صرت أخاف من دقات قلبي نفسها، مو من مرض معين ولا عندي تشخيص ولا شي، السالفة بدأت يوم حسيت نبضي سريع وأنا متوتر، ومن بعدها كأني صرت أراقب جسمي أربع وعشرين ساعة، إذا نبضي زاد بعد القهوة أنتبه، إذا طلعت درج وقلبي دق أسرع أنتبه،

إذا نمت على جنبي وسمعته بأذني أقوم أعدل نومتي، وكل ما ركزت عليه يزيد، وكل ما زاد أقول أكيد فيه شي، وأعرف إن الخوف نفسه يسرع النبض بس وقتها ما أقدر أقنع نفسي، ووصلت فيني إني أحياناً أحط أصابعي وأحسب الدقات بدون سبب، وإذا كانت أعلى من اللي متوقعه ينخرب يومي كله،

وأكره أتكلم مع الناس عن الموضوع لأن نصهم بيقول لك لا توسوس والنص الثاني يعطيك قصص أمراض ناس يعرفهم ويزيد الطين بله، أنا مو طالب تشخيص من أحد، بس ودي أفهم هل فيه ناس فعلاً وصلت لمرحلة صار انتباهها الطبيعي لجسمها مبالغ فيه لدرجة كل إحساس بسيط يصير إنذار،

لأني قبل كنت أعيش وما أعرف كم نبضي أصلاً، والحين أحس إني صرت موظف مراقبة داخل جسمي، حتى أيام أكون مبسوط فجأة أنتبه لنفسي وأقول ليه قلبي سريع شوي وأطلع من اللحظة كلها، وأخاف أروح أفحص ويقولون ما فيك شي وأرجع أوسوس، وأخاف ما أفحص ويطلع كان فيه شي،

وهذي المنطقة بين الاحتمالين متعبه بشكل ما يعرفه إلا اللي جرب يعيش وهو يشك حتى بالإشارات الطبيعية من جسمه.