في شي ما حدا بيعرفه عني تقريباً، أنا مديون، والمشكلة مو بالدين نفسه قد ما هي بالصورة اللي عايشها قدام الناس، الكل مفكر وضعي مرتاح لأني بشتغل وبطلع وبجيب هدايا بالمناسبات وما بطلب مساعدة من حدا، والحقيقة إني آخر كل شهر بعمل حسابات كأني عم بحل مسألة رياضيات،

هاد يتأجل وهاد يندفع وهاد بنسكره من هون، ومرات بعزم ناس لأني بخجل قول ما معي، وبرجع بندم لأنه المبلغ اللي دفعته كان ممكن يسكر شي أهم، بعرف إنه تصرف غبي جداً وبعرف إني جزء كبير من المشكلة، بس لما تعيش سنين بصورة الشخص اللي أموره تمام بصير صعب فجأة تقول للناس لأ ما بقدر،

حتى لأهلي ما بحكي، مو خوف من إنهم ما يساعدوني، بالعكس يمكن يساعدوني، بس بخاف تتغير نظرتهم إلي ويصير كل شي بشتريه بعدين محسوب، وكل طلعة يسألوني من وين، فعم بحاول أسكر الموضوع لحالي، وفعلاً بلشت أوقف مصاريف كثير وأرتب حالي، بس أصعب شي اكتشفته إنه الدين مش بس أرقام،

هو شعور ملازم، بتصحى بتتذكره، يرن تلفونك بتخاف يكون مطالبة، يجيك راتب تفرح فيه خمس دقايق وبعدين تشوفه يتوزع قدامك قبل ما تحس إنه إجا، ويمكن أكتر اعتراف محرج إني مرات كنت أصرف مصاري ما معي بس حتى ما حدا يعرف إني ما معي، يعني دفعت ثمن المحافظة على صورة كاذبة،

وهسا عم بحاول أصلح الرقم والصورة مع بعض.