عندي سؤال يمكن يزعّل ناس كثير، ليش لازم كل إنسان يكون عنده حلم ضخم ورسالة بالحياة وطموح ما إله سقف، أنا بصراحة وصلت لمرحلة أمنيتي أعيش حياة هادية، يكون عندي دخل يكفيني، بيت مرتاح فيه، ناس أحبهم ويحبوني، أصحى بدون خوف من كارثة، أرجع من شغلي وعندي طاقة أقعد مع أهلي وأضحك وأنام وأنا راسي هادي،

بس كل ما أحكي هيك لحد بحسسني إني استسلمت، لازم تعمل بزنس، لازم تصير غني، لازم تسافر أكثر، لازم يكون عندك هدف أكبر، حتى الراحة صارت عند الناس كأنها جريمة أو دليل إنك شخص ما عندك طموح، وأنا ما بقول إني ضد النجاح ولا المصاري ولا الإنجاز، بالعكس إذا إجت فرصة بتفيدني أكيد باخدها،

بس ليش لازم أعيش كل يوم حاسس إني متأخر عن نسخة خيالية مني المفروض تكون مليونير ومشهور وعنده عشر مشاريع، يمكن طموحي الحقيقي إني ما أصير عبد للطموح نفسه، يمكن النجاح بالنسبة إلي إني أعرف متى أقول كفاية وأستمتع باللي عندي بدل ما أركض طول عمري ورا المرحلة الجاية،

بس مرات بخاف يكون هالحكي مجرد تبرير للكسل وأنا مش منتبه، ومرات ثانية بشوف ناس وصلوا لأشياء كبيرة ولسا وجوههم متوترة وحياتهم سباق فأقول يمكن أنا مش غلطان، يمكن مش كل واحد لازم يطلع فوق الجبل، يمكن في ناس كل اللي بدها إياه مكان هادي تحت الجبل وتعيش عمرها وهي مرتاحة،

والسؤال اللي فعلاً محتاج أفهمه هل الرضا طموح بحد ذاته ولا المجتمع صار يعتبر الإنسان فاشل لمجرد إنه ما بده أكتر من حياة طبيعية.