آني عندي غيرة من زوجة أخوي وما أعرف إذا الغلط بيها لو بيه، من أول ما دخلت للبيت الكل حبها بسرعة بطريقة خلتني أحس إن مكاني تغير، أمي صارت تتصل بيها أكثر، أبويه يسمع رأيها، حتى بالمناسبات إذا غابت يسألون وينها وكأنها صارت محور القعدة، بالبداية كنت أگول طبيعي جديدة ولازم نحسسها إنها من البيت،

بس مع الوقت بدا داخلي شي مو حلو، أي شي تسويه أفسره غلط، إذا جابت هدية أگول تريد تكسبهم، إذا سكتت أگول متكبرة، إذا ساعدت أگول تمثل، والمشكلة إنها فعلياً ما سوت وياي شي سيئ واضح، يمكن مرات حچت كلمة ما عجبتني بس ما توصل لكل هالكره اللي أحسه، وأنا أعرف إن جزء كبير من السالفة مو هي،

السالفة إني طول عمري كنت الأقرب لأهلي ولما دخل شخص جديد ولقى مكان بسرعة حسيت كأن أحد أخذ جزء مني، وبدال ما أعترف لنفسي رحت جمعت عليها ملاحظات صغيرة حتى أقنع نفسي إن إحساسي مبرر، والأسوأ إني مرة شفتها تبچي بسبب مشكلة بينها وبين أخوي وحسيت بشي بسيط داخلي فرح،

وهنا خفت من نفسي فعلاً، لأن هذي مو غيرة عابرة إذا وصلت لمرحلة ترتاح لمصيبة شخص ما أذاك، ومن يومها أحاول أراجع نفسي وأتعامل وياها طبيعي بس بصراحة لسا مرات كلمة مدح من أمي إلها تكفي تخرب مزاجي ساعات، وآني مستحي حتى من الاعتراف لأن الناس تحب تقول إحنا أهل وكلنا واحد،

بس الحقيقة إن دخول شخص جديد للعائلة مرات يطلع أشياء طفولية ومدفونة داخل الإنسان هو نفسه ما كان يعرف إنها موجودة.