عندي اعتراف مالي ما بعرف إذا هو غباء ولا ضعف، أنا أخدت قرض باسم شخص قريب مني لأنه ما كان يقدر ياخده باسمه، وقتها كنت واثق فيه ثقة عمياء وقال لي الأقساط كلها عليه وأنا بس اسمي، أول كم شهر كان يدفع طبيعي وبعدها بدأت الأعذار، مرة متأخر راتبه ومرة عنده ظرف ومرة الشهر الجاي بيعوض،

وبعد فترة اكتشفت إنه داخل بقروض ثانية ومشاكل أكبر بكثير مما كان حاكيلي، وهسا أنا فعلياً اللي عم بدفع جزء كبير حتى ما يتأثر اسمي، والمشكلة إني مخبي القصة عن البيت كله لأن لو عرفوا شو عملت راح تقوم القيامة، وكل شهر لما ينزل القسط بحس إني بدفع ثمن ثقتي مو ثمن قرض،

وهو كل مرة يحلفلي إنه راح يرتب أموره وأنا من جوا بطلت أصدقه بس ما عندي رفاهية أعمل مشكلة كبيرة لأنه إذا قطع الدفع نهائياً أنا اللي رح أتورط، وصرت أكرهه وأشفق عليه بنفس الوقت، وأكره نفسي أكثر لأني وقتها حسيت حالي بطل وبدي أساعد شخص عزيز، وما فكرت إنه ممكن الحب والثقة ما يكفوا كضمان مالي،

وأكتر شي يقتلني إنه الناس حولي تسألني ليش صرت حريص بالمصروف وأنا بضحك وأقول بدي أوفر، وما حدا عارف إني قاعد أصلح قرار واحد غبي ممكن ياخذ مني سنين.