أنا متزوجة وبحترم زوجي وبحبه بس عندي سر بحياتي من قبل الزواج عمري ما حكيته، كان في شخص بحياتي زمان وما تم نصيب، وانقطعنا تمام سنين، من فترة شفته صدفة بمناسبة، ما حكى معي غير سلام عادي جداً بس من يومها مخي قلب، رجعت أتذكر أشياء كنت مفكرة إني دفنتها،

رجعت على البيت وأنا حاسة بذنب كأني خنت زوجي مع إني ما عملت ولا كلمة غلط، ومن وقتها صرت أفتح حسابه من بعيد كل فترة وأشوف حياته وين وصلت، إذا نزل صورة مع عيلته بسكر وأنا مضايقة، وإذا ما نزل شي برضه بتضايق، وأنا عارفة إن الموضوع مش حب بالشكل اللي يخليي أترك بيتي،

مستحيل، بس يمكن في جزء مني متعلق بالنسخة القديمة مني اللي كانت قبل المسؤوليات والزواج والأهل والولاد، ويمكن أنا مشتاقة لمرحلة مش للشخص نفسه، بس كيف أفرق؟ وكيف الإنسان يكون وفي إذا عقله أحياناً يرجع لماضيه بدون إذنه؟

الأصعب إنه زوجي فعلاً ما مقصر معي، وهاد بخلي ذنبي أكبر، لو كان سيئ كنت لقيت حجة لنفسي، بس هو منيح، ولما يحن علي بحس إني وسخة لأني قبل ساعات كنت فاتحة صفحة شخص ثاني، مرات بدي أحذف كلشي وأسلم من القصة ومرات بقول شو الضرر ما دام ما في تواصل، بس يمكن الخيانة مش دايماً فعل، يمكن مرات المساحة اللي بتعطيها لشخص برا زواجك براسك وقلبك بتكون أخطر من ألف رسالة.