أنا عندي مشكلة مع أختي وصلت لمرحلة أستحي أعترف فيها، أنا ما عاد أثق فيها ولا أحب أحكيلها أي شي عن حياتي رغم إن الناس كلها شايفتنا خوات قريبين، السبب مو موقف واحد، السبب سنين من المنافسة المغلفة بالمحبة، إذا جبت شي تمدحه وبعدين تجيب أغلى، إذا ضعفت قدامها بيوم من الأيام بعد فترة ألقى نفس المعلومة مستخدمة ضدي بطريقة ملتوية،

إذا حدا مدحني قدامها لازم تحكي قصة تقلل من الموضوع، وكنت كل مرة أقول يمكن أنا حساسة أو أتخيل، لحد ما انخطبت وصارت تحكي قدام خطيبي مزح عن علاقات قديمة ومواقف شخصية ما كان لازم تنذكر، وقتها حسيت إنها فعلاً بتوجعني وهي عارفة، واجهتها بكت وقالت إني ظلمتها وإنها بس تمزح،

وأمي دخلت وصار الكلام المعروف هاي أختك وما إلك غيرها، ومن يومها أنا عاملة حالي سامحت بس فعلياً سكرت باب كامل، ما بحكيلها غير الأشياء اللي لو عرفها الشارع كله ما تفرق معي، المشكلة إنها حست وصارت تشتكي إني تغيرت، وأهلي بدهم يرجعونا زي قبل كأن الثقة زر بنكبسه،

وأنا صرت مقتنعة إنه صلة الرحم ما تعني إني أسلم مفاتيح قلبي لأي حدا لمجرد إنه من دمي، ممكن أحبها وأوقف معها لو احتاجتني وأظل بنفس الوقت أعرف إنها مش مكان آمن لأسراري، والسؤال اللي مأكلني: هل هاي حكمة وحدود ولا أنا فعلياً بعاقبها بصمت من غير ما أعطيها فرصة حقيقية تصلح شي.