أنا عندي خوف من المرض وصل لمرحلة إني خربت على حالي نص حياتي وأنا جسدياً الحمد لله كويس، أي وجع بسيط عندي بصير قصة، صداع يعني شي بالمخ، خفقان يعني القلب، تعب يعني مرض خطير، وبصير أقرأ وأقارن وأفحص حالي بالمراية وأضغط أماكن بجسمي لحد ما أصلاً توجع من كثر ما بلمسها،

وبعدها أخاف أكثر، المشكلة إني بخاف من الفحص وبخاف من عدم الفحص، إذا رحت دكتور واستبعد شي بارتاح يومين وبعدين مخي يلاقي احتمال ثاني، وإذا ما رحت بقول يمكن أنا أهملت إنذار، حتى زوجتي زهقت من كثرة ما أسألها شايفة وجهي أصفر، بتحسي في ورم هون، نبضي سريع صح،

وصارت ترد علي بعصبية وأنا بعرف معها حق بس برضه ما بقدر أوقف، مرات أشوف ناس عندها أمراض حقيقية ومع هيك عايشين يومهم وأنا سليم وقاعد أستهلك يومي بالخوف من مرض يمكن ما يجي أصلاً، وهذا الاشي صار يخليني أفكر إنه يمكن المشكلة مش خوفي من المرض نفسه،

يمكن خوفي من فكرة إني ما بقدر أسيطر على كلشي، وإنه في أشياء ممكن تصير فجأة مهما كنت مرتب، وأنا شخص طول عمري بواجه القلق بالتخطيط، بس الجسم ما بينفع معه التخطيط، وهذا أكتر شي بيرعبني، وبدي أعرف كيف الواحد يتعلم يعيش مع فكرة إنه ما في ضمان كامل بدون ما يحول حياته كلها لغرفة انتظار لخبر سيئ.