أنا بغير من زوجة أخوي وبعرف إن الشعور قبيح بس ما بقدر أنكره، قبل ما تيجي كنت أنا الأقرب لأمي، كلشي تحكيلي إياه، كل مناسبة أرتبها، كل قرار تسألني، بعد زواج أخوي شوي شوي صارت مرتو قريبة منها بطريقة خلتني أحس إني انزحت، بتروح معها مشاوير، تستشيرها بالأكل واللبس،

تحكيلها أسرار، وأحياناً أسمع خبر عن أمي منها هي قبلي، وأنا من برا أضحك وأقول الله يديم محبتكم ومن جوا بغلي، حاولت أقنع حالي إنه طبيعي ويمكن أصلاً شي حلو إنه مرت أخوي تحب أهلي بدل المشاكل المعتادة، بس أنا بلشت أفسر كل حركة منها بشكل سيئ، إذا جابت هدية أقول بتتملق،

إذا ساعدت أقول بدها تثبت إنها الأفضل، إذا أمي مدحتها أضل مضايقة طول اليوم، والصدمة الحقيقية كانت يوم صار بينهم خلاف بسيط وحسيت بلحظة راحة، بعدها خفت من نفسي، هي فعلياً ما أذتني، يمكن أنا اللي عم أظلمها بسبب إحساس قديم إنه محبة أمي مورد محدود ولازم أنا أضل آخد الحصة الأكبر،

وما قدرت أحكي لحد لأن أي حدا رح يقول عيب هاي غيرة سخيفة، بس المشاعر السخيفة برضه موجودة، وأنا عم أحاول أتعامل معها بدون ما أحولها لأذى، وأحياناً بفكر يمكن كثير من مشاكل الحماة والكنات والخوات تبدأ من هاي النقطة وما حدا عنده شجاعة يحكيها بصراحة: الخوف من إن شخص جديد يدخل العيلة وياخد مكان كنت معتبره ملكك.