أبوي تجوّز عليها وإحنا عرفنا يوم العرس.
أمي كانت عم تحضّر غدا الجمعة، وخالتي اتصلت عليها وقالت لها جملة. وأمي سكّرت التلفون وقعدت على الكرسي بالمطبخ وما حكت ولا كلمة لنص ساعة. وأنا كنت واقف وما جرؤت أسأل.
بعدها عرفنا كل شي: العقد صار من شهرين، والعرس بكرة، وكل أهله كانوا بيعرفوا. إحنا بس اللي ما بنعرف.
عمري وقتها خمسة وعشرين. وأمي عمرها كان ثمانية وأربعين وعايشة معه ستة وعشرين سنة.
ما طلّقها وما قصّر بإشي مادّي — هاي الجملة اللي بيقولوها الناس لما بدهم يسكّتوك. وهي صحيحة، ما قصّر. بس أمي بطّلت تطبخ أكلات كانت تتعب عليها، وصارت تنام بغرفة إخوتي، وفي ستّة أشهر نحفت بشكل خوّفنا.
وأنا اللي بقتلني مش هو. أمي.
لأن أمي بعد سنة صارت تحكي عنه عادي، وتسأل عنه لما يتأخر، وتحضّرله غراضه لما يسافر. وأنا بتجنن. بدي أهزّها وأقول لها: ليش؟ ليش هيك بسهولة؟
وبعدها بفهم إنه مش بسهولة. إنه هاد الشي الوحيد اللي بتعرف تعمله، وإنه الست وعشرين سنة ما إلها مكان ترجع فيه.
وأنا من يومها ما قدرت أرجع أحترمه مثل قبل، وما قدرت أفهم أمي، وما قدرت أحكي مع إخوتي بالموضوع لأنهم أصغر.
بسأل اللي مرقوا بهاد: كيف بتتعامل مع أب ما غلط قانونياً بشي، وأنت حاسس إنه كسر إشي ما بينتصلّح؟
التعليقات