من شاب

أنا شاب عمري ٢٤ سنة، متزوج، وعندي عيلة صغيرة فيها بنتين، والحمد لله حياتنا ماشية، وأنا وزوجتي بنحب بعض كتير، وهي متعلقة فيني بشكل ما بتتخيلوه، أحيانًا بحس إنها بتتعلق فيني أكتر من الطفل بأمه، وصار لنا خمس سنين متزوجين، وصبرت عليّ بكتير ظروف.

شغلي بطبيعته بتعامل فيه مع نساء أكتر من الشباب، وبالنهاية هذا شغلي.

بيوم من الأيام، كنت بالشغل، وعندي زبونات قاعدين عالطاولة، أختين مع أولادهم.

أنا كنت تعبان، نزل ضغطي ودخت، فبلغوا هدول الأختين.

وكانوا قبلها بفترة أخدوا حسابي على التيك توك، علماً أن صفحتي للعمل فقط وكلهم زباين.

تاني يوم، وحدة من الأختين بعتتلي تطمن عليّ، كانت مؤدبة ومحترمة، وتعرفت علي، وقالتلي إنها أرملة وعايشة مع عمها.

شوي شوي، بلشنا نحكي على الإنستغرام، وبعدها على الواتساب.

وخلال فترة قصيرة حبينا بعض، مع إنها أصغر مني، وأنا من قبل حتى ما أتزوج، كان في ببالي أتزوج أرملة عندها أطفال، لوجه الله، ومن باب الأجر والثواب.

تعلّقنا ببعض بشكل مش طبيعي، صرت ما أنام غير ساعتين باليوم، وبحس إني شبعان نوم، بس بدي أحكي معها.

وحكينا، ووعدنا بعض إنو خلال فترة قصيرة نرتبط رسمي.

المفاجأة، إنو بعد ما حبينا بعض، اكتشفت إنها من أصحاب المال، يعني من الأغنياء ، وعندها أموال خاصة فيها، وربي شاهد ما كنت أعرف هالشي غير بعد ما تعلّقنا ببعض من القلب.

هي كمان حبتني على شغلتين كانت فاقداهم بحياتها: الحنان، والاهتمام، وكانت مكسورة نفسياً كتير، ومرت بأيام صعبة.

أنا حبيتها من كل قلبي، وبقلب صافي، وقلت إلها: لما أجي أخطبك، رح أرمي الدنيا كلها ورا ضهري كرمالك، وما رح أسمح أخسرك، ومستعد أعمل المستحيل.

بس المشكلة عندي هلأ: زوجتي الحالية، بحبها وما أنكر هالشي، بس صار موقف مع أمها، وكانت هي سبب كبير خلاني أبلّش أفتّش على بنت حلال تانية.

زوجتي نفسها ما إلها ذنب، بس مثل ما بيقولوا: "كلمة بتعمر بيت، وكلمة بتخرب بيت"، وكلمة أمها خربت بيت بنتها.

وصليت استخارة لزواجي الثاني، وطلع خير، وحلمت إني خطبت، والبنت بالحلم كانت نفسها بالحقيقة، وفسرت المنام، وطلع خير لي.

المشكلة: لو تزوجتها، زوجتي رح تطلب الطلاق، وأنا مش عارف شو أعمل، أنا ما بدي أظلم، وما بدي أكون خائن..

انصحوني.. شو أعمل .. أرجوكم بدون تجريح.