بحس حالي بحكي كتير غصب عني ومش انتباه ولا استعراض بس لساني بيفلت قبل ما دماغي يلحقه، بقعد مع الناس وبقول لحالي رح اسكت هالمرة ورح اسمع وبس دقايق بلاقي حالي فاتح موضوع ومن موضوع لموضوع وبفضح افكاري وحدة وحدة وكأني مش انا اللي عم بحكي، مرات بسمع صوتي من برا وبنحرج من حالي بس ما بقدر اوقف، بحكي وانا متوتر وبضحك زيادة وبعيد نفس الجملة بطريقتين تلاتة وانا شايف العيون كيف عم تمل وعم تستنى اسكت، بعدين بروح عالبيت وبصير اعيد المشاهد براسي كلمة كلمة وبجلد حالي انو ليش حكيت وليش شاركت هالتفصيل وليش ضحكت بهالوقت، في ناس بتفكرني اجتماعي زيادة ومرتاح بس الحقيقة انو هالحكي درع بخبي فيه قلقي وصمتي اللي بخوفني اكتر من نظراتهم، بس اسكت بحس فراغ وراس مليان ضجيج فبطلع الضجيج حكي، مش واعي عاللحظة الا لما تخلص وبكون حرقت كل طاقتي وصار براسي صداع وقلبي تقيل، مرات بسرق لحظة حد تاني وهو عم يحكي وبكمل عنه بلا وعي وبنتبه متأخر اني قطعت عليه، بكره هالعادة وبحبها بنفس الوقت لانو بحسها الشي الوحيد اللي مخليني موجود، بس مؤلم تشوف حالك عم تخسر ناس لانك ما بتعرف تسكر تمك، في مواقف حساسة ضيعتها ونكات خربتها وصداقات بردت بس لان لساني سبقني، بقول رح اتغير وبجرّب اعد للعشرة قبل ما احكي بس العشرة بتطير وبيضل الكلام، انا مش ثرثار لاني بحب الصوت انا ثرثار لاني بخاف من الصمت وبخاف من اللحظة اللي اكون فيها انا وراسي بلا تشويش، يمكن الناس تبحث عن هالاعتراف لان كتير منا عم يحكي مشان ما ينهار من جواتو وانا واحد منهم عم اكتب هالكلام وعم بحس لساني بعدها بدو يكمل ويحكي اكتر بس عم غصبو يوقف هون ولو بصعوبة وغلطات كتيير.