عرفت بخيانتها بالغلط وما كانش عندي استعداد نعرف هاد السر وانا باقي كنضحك وكنفطر معاها وكنسمع صوتها فالدّار بحال العادة، شفت الرسائل بعيني وما بقات حتى حاجة للشك بس قلبي ما صدقش وكرامتي وقفات قدامي بحال حيط، كنحبها حب يعذب وكنموت عليها ولكن كنخاف نهضر ليها ونقول ليها راه عرفت حيث عارف راسي اذا عرفات اني عارف وبقيت معاها غادي نولي فعيونها ضعيف ومكسور وما عنديش القوة نعيش هاد الصورة، كنعيش حياتي بنار هادية كتفور من الداخل كنشوفها خارجة وداخلة كنشك فكل حركة وكنقتل راسي بالخيال، كنقول يمكن غلطة ويمكن كانت مرحلة ولكن الرسائل كتعاود تطلع فبالّي وتفكّرني بالحقيقة المرة، كنضحك مع صحابي وكنبان عادي وانا من الداخل متفحّم، ما قدرتش نواجه وما قدرتش ننسى وما قدرتش نطلع من هاد القفص اللي سميتو حب، كرامتي كتقولي سير فحالك وقلبك كيشدك ليها بحبال ما كتبانش، كنبات حداها فالليل وكنسمع نفسها وكنحس براسي غريب فسرير كان ديالي، كنخاف نهضر وكنخاف نسكت وكل اختيار كيوجع اكثر من اللي قبلو، يمكن هاد الاعتراف جارح حيث كيبين راجل عارف ومكبل فآن واحد وعايش بنص حياة وبنص روح، كنقول غدا نكون قوي وغدا نواجه ولكن الغد كيدوز وانا باقي كنحترق وكنغلط فالهضرة وكنسرح بعيني وما بقى عندي سلام غير هاد الصمت اللي كياكلني شوية بشوية.