انسرقت سيارتي والنار فعليا بتاكل براسي مش عشان السيارة راحت ولا عشان الخسارة لانو الحمدلله قادر اجيب احسن منها بمرات بس القهر الحقيقي انو الاحساس اللي خنقني هو انو السارق مش غريب ولا واحد من الشارع ولا عصابة عشوائية القهر انو كل خلية بجسمي بتحكيلي

انو واحد قريب مني واحد كنت اضحك معاه واجلسه ببيتي واشربه قهوتي هو اللي مد ايده وسرقني مش السرقة نفسها اللي وجعتني قد ما فكرة انو في واحد كان عم يراقبني يعد علي نفسي يتمنى اني انكسر ويحب يشوفني ناقص شي ويضحك من وراي القصة مش سيارة القصة انو ثقتي

انذبحت وكرامتي انداست وحاسس حالي كنت ساذج وطيّب زيادة عن اللزوم وكل ابتسامة عطيتها كانت دعوة مفتوحة لحدا يعلم علي ويطعني من ظهري وصرت اراجع كل موقف وكل كلمة وكل غمزة وكل مزحة كانت تخبي حقد وغيرة وانا غبي مفكرها طيبة قلب وحب واللي بقهر اكثر اني

ما بقدر احكي ولا اتهم ولا اواجه لانو ما معي دليل غير صوت براسي عم يصرخ بالحقيقة وصار النوم يهرب مني مش خوف ولا حزن بس غليان داخلي كل ما اشوف ناس بحبهم بحس قلبي مش مرتاح وكل ما اشوف السيارة الفاضية قدام البيت بحس كأني انسرقت مرتين مرة بالحديد

ومرة بالروح وصرت افهم ليش في ناس بتقسى ليش بتسكر قلبها وليش بتصير ما تثق بحد لانو الخيانة لما تجي من قريب بتعلّمك دروس قذرة وتغيّرك غصب عنك وتخلّيك تشك حتى بظلّك وتكره حالك على طيبتك وتقول يا ريتني كنت اشرس شوي يا ريتني ما فتحت بيتي ولا قلبي

ولا حياتي لحدا ويمكن اكثر شي جارح اني مجبور اكمل كأني مش عارف مين عملها وأضحك بنفس الوجوه اللي سرقتني وامثل انو عادي بس جواتي في شي انكسر وما رح يرجع زي قبل ابدا ولو رجعت السيارة نفسها ما رح يرجع الانسان اللي كنتو قبل هالطعنة.