عمري ما حكيت لحتى واحد بهاد الشي ولكن بصراحة انا درت واحد الحاجة لي غادي تبان للناس خيانة كبيرة وما غاديش يسامحوني عليها، كنت معروف بين صحابي والعائلة ديالي بلي أنا ديما كنشجع على التبرعات وكنمشي للمبادرات الخيرية وكنحط تصاور ديال الأطفال المحتاجين وكنكتب كلام مؤثر على الرحمة والضمير وكنت كنقول ليهم راه الدنيا فانية وخصنا نعاونو بعضياتنا، ولكن الحقيقة لي كتوجع هي أنني فواحد الفترة كنت أنا لي كنجمع الفلوس وكنقول غادي نوصلها لناس محتاجين وكنت فعلا كنوصل جزء صغير باش مايبانش الشك، والباقي كنت كنحتافظ بيه لنفسي بحجة أنني محتاج أكثر منهم وأنني أنا لي تعبت وجمعت العلاقات وحرّكت الناس يتبرعو، كنت كنبرر راسي ونقول بلي هادشي مقابل المجهود ديالي وكنقنع نفسي أنني ماشي سرقة حيت حتى أنا عندي مصاريف وضغوطات، وكنت كنعيش بوجهين واحد قدام الناس فيه التقوى والمثالية وواحد خفي فيه الطمع والجشع، الأسوء أنني مرات كنت كنشوف نظرة الامتنان فعينين شي واحد فعلا محتاج وكنحس بوخزة فقلبي ولكن كنقسا عليه ونرجع نقول راه لو ماكنت أنا ماكان حتى درهم يوصل ليه، وهاد التفكير خلاّني نغرق أكثر وأكثر حتى وليت كنخطط للحملات بحساب شحال نقدر ناخد بلا مايبان والو، وكنت كنخاف غير من الفضيحة ماشي من الذنب، كنخاف على سمعتي وسط العائلة حيت تربيت على أنو السمعة هي كلشي وعيب كبير يبان الواحد نصاب قدام الناس، ودابا ملي كنسمع شي حد كيهضر على الأمانة كنحس براسي منافق حقيقي ولكن مازال ماقدرتش نرجع الفلوس ولا نعتارف لشي حد حيت لو تفضحت غادي نطيح من عينينهم كاملين ويمكن حتى واليديا مايبقاوش يثيقو فيا، وأنا عايش بهاد السر كنضحك ونهضر على القيم والشرف قدامهم وقلبي عامر خوف وقلق وكنعرف بلي لو خرج هاد الموضوع للعلن غادي يكون صادم وقاسي بزاف وماكاين حتى تبرير يقدر يمسح وصمة بحال هادي لي درتها بيدي وبرغبة مني وماشي بضغط من حد وهاد الشي هو أثقل سر شايلو فصدري وكيخنقني كل نهار أكثر من لي قبلو