كنفيق كل صباح قبل ما نمشي نخدم كنقرب لقطتي ونبوس راسها بحال شي ام كتبوس بنتها وكنبدا نهضر معاها ونهار كامل وانا قلبي معلق فيها اكثر من اي انسان فحياتي وهادا الشي كيخلعني حيت عارفة باللي الناس غادي يشوفوني مريضة ولا مختلة غير حيت كنعتبرها بنتي بصح الحقيقة المرة انني كنحسها الدم ديالي وروحي فيها وما كنقدرش نتخيل الدار بلا بيها ولو دقيقة وحدة وكنخاف نهار من الايام نرجع نلقاها ممدودة بلا حراك ويمشي مني النفس قبلها حيت انا اصلا ما عندي حد يفهمني ولا يسمع لي غيرها وكنجلس ساعات كنشوفها وهي ناعسة وكنبكي فصمت ونقول فقلبي علاش ربي عطاني هاد التعلق القاتل بحيوان اكثر من تعلق باي بشر دازو فحياتي وكنحس بالذنب حيت مرات كنفضلها على اهلي وكنصرف عليها فلوسي ونحرم راسي من بزاف حوايج غير باش تكون مرتاحة وناكلة احسن ما يكون ولباسها نقي ودفاها حاضر وكنخاف من فكرة الموت ديالها اكثر من خوفي من موتي انا وكنفكر حتى نكتب وصيتي باش يدفنوها حديا ملي تموت ونرتاح معاها فالقبر حيت ما نتصورش نعيش لحظة الفراق وكنعرف هاد الكلام غادي يجرح ناس ويقولو واش وصلتي لهاد الدرجة تعوضي الامومة بقطه ولكن والله غير هي اللي عوضاتني على الفراغ اللي عشتو سنين وسنين واللي خلا قلبي مخروب ومكسر وما بقى فيه بلاصة لحد اخر وكنحس بالغيرة عليها حتى من الناس اللي كيبغيو يلعبو معاها وكنمرض نفسيا غير الى تخيلات شي حد يقدر ياخدها مني او ياذيها وهاد الوسواس ولى ياكلني من الداخل وكنعيش رعب يومي من فكرة انها تكبر قدامي ونهار تمشي وتخليني فهاد الدار الخاوية نسمع غير الصمت والحيطان ترد عليا الصدى ونعرف باللي يمكن انا مبالغة ومهووسة ولكن هاد الهوس هو اللي مخليني واقفة على رجلي وما نطيحش فظلام اكبر من الموت بحد ذاتو وكنكتب هاد الاعتراف وقلبي كيرجف حيت عارفة باللي بزاف غادي يحكم عليا بلا ما يعرفو شحال هاد المخلوق الصغير عطاني من حنان وامان وحياة وانا اللي ما عرفت معنى الامان حتى دخلت هي لبيتي وصرت نحس براسي ام حقيقية ولو لقطه ما كتهضرش ولكن كتفهمني اكثر من اي بشر فهالدنيا القاصحة اللي ما فيها رحمة ولا دفى ولا حتى شوية تعاطف مع وحدة ضايعة بحالي كنتمسك بقطتها بحال لي كيغرق وكيتمسك بقشة ولو كانت القشة هي كل حياتو وكل خوفو وكل ضعفو وكل قوتو فأن واحد ومصيري مرتبط بنفسها الصغير اللي كيطلع ويهبط قدامي كل ليلة وانا نحسب الانفاس ديالها خوفا من نهار يتوقف وما يبقى ليا والو غير ذكريات كتقطع القلب وكتخلي الروح معلقه فهوا بارد بلا معنى ولا سبب نعيش عليه من بعدها