انا كل يوم بصحى من النوم وانا حاسس انو في شي رح ينكسر بحياتي فجأة، مش حادث ولا مرض لا، بس مكالمة وحدة او ايميل صغير يقولولي فيه “خلص ما بدنا اياك” ووقتها بحس الدنيا كلها رح تنهار فوق راسي، لانو انا مو بس خايف اخسر شغل، انا خايف اخسر السقف اللي فوقي، خايف من لحظة الاقي حالي واقف بالشارع ومعي شنطة فيها كم غرض وما عندي مكان اروح عليه، الناس بتفكر انو الوظيفة مجرد راتب آخر الشهر بس بالنسبة الي هي الأمان الوحيد اللي ماسكني من الانهيار، كل يوم بشتغل زيادة عن اللزوم، بضحك بوجه ناس بكرههم، بوافق على شغلات غلط، بس عشان ما حدا يحطني بلستة اللي ممكن تنطرد، صرت اعيش دور الموظف المثالي لدرجة اني نسيت انا شو بدي اصلا، حتى لما المدير يناديني بقلبي بدق كأنو رح يقلي “تعال وقع هون”، وبقعد طول الليل افكر لو صار هالشي شو رح اعمل؟ وين بدي اروح؟ كيف بدي ادفع الاجار؟ مين رح يقبل يوظفني بسرعة؟ واسوء اشي اني ما عندي خطة بديلة، ولا عندي بيت، ولا حتى حدا اقدر ارجعله، وهاد الاحساس بيخليني حاسس اني مربوط بخيط رفيع جدا، والكل حواليني عايش طبيعي كأنو الموضوع بسيط، بس انا جواي عايش كابوس يومي، كابوس انو ممكن بيوم عادي جدا حياتي كلها تنمسح بضغطة زر واصير مجرد واحد ضايع بالشارع محدش سائل فيه، وهاي الفكرة صارت تاكلني من جوا لدرجة اني مرات بتمنى لو ينتهي الموضوع بسرعة بدل ما اضل عايش بهالخوف البطيء اللي ما اله نهاية.