أنا بقول للناس إني مبحبش النفاق وبكره اللف والدوران، بس الحقيقة إني عايش حياتي كلها على التمثيل، قدام أهلي أنا العاقل اللي فاهم الأصول وقدام الشغل أنا الجدع اللي يشيل المسؤولية وقدام صحابي أنا الخفيف اللي مفيش حاجة بتكسره، إنما لما بقفل الباب على نفسي بحس إني ولا حاجة من دول، أنا شخص جبان وغيور ومليان كلام أسود مش عارف يطلع، ساعات ببص على اللي حواليا وأتمنى فضيحة صغيرة تطلع لهم عشان الناس تبطل تشوفهم أحسن مني، وده مش كلام اتقال في لحظة غضب، ده إحساس متربي جوايا من زمان، من ساعة ما كنت بشوف الناس بتتصور في مناسباتها وأنا بحاول أبان مبسوط وأنا أصلاً حاسس إني زيادة في الصورة، بكره إن الناس بتحترم اللي معاه فلوس حتى لو قليل الأصل، وبتدي محاضرات أخلاق للي مفلس حتى لو قلبه نضيف، بكره إن الواحد لو اتأخر عن الجواز يبقى عليه علامات استفهام، ولو سكت يبقى ضعيف، ولو اشتكى يبقى نكدي، ولو حاول يغير حياته يقولوله احمد ربك، أنا بضحك على كل ده وبرد بكلام متزن، بس من جوايا نفسي أصرخ وأقول إن المجتمع ده بيعبد المظاهر وبيدفن اللي مش قادر يواكب، وأقذر حاجة فيا إني بقيت بلعب نفس اللعبة، بقيت أختار لبسي وكلامي وصوري عشان أبين أحسن من حقيقتي، وبقيت أكره نفسي لما حد يصدق الصورة المزيفة ويقولي إنت ما شاء الله عليك مرتاح، وأنا عارف إني من جوه متكسر ومتربك ومش مرتاح ولا يوم.