مرات أخويا متجوزه اخويا بقالها 10 سنين وما عندهاش أطفال وهي لسه صغيرة عندها 33 سنة والمشكلة إن محدش عارف سبب التأخير والدكاترة قالولها صعب تخلفي وأخويا كان متجوزها عن حب ودلوقتي رايح يتجوز التانية وخطب خلاص وثالث يوم العيد فرحه هو مش عامل فرح كبير بس عامل زي عزومة عشاء والعروسة الجديدة قالتله أنا أول مرة أتجوز وعايزة ألبس فستان وأعمل زفة
وأنا قلبي موجوع على مرات أخويا لأني بحبها جدا وهي ساكتة ومستسلمة وقالتلي من حقه يشوف أولاده وهو قال مستحيل أطلقها امبارح كنا أنا وهي في المطبخ عند ماما وهو دخل يسألها عن الفطار لان كلنا صايمين وبيهزر ويضحك كأن الموضوع عادي وهي عينها كلها كانت دموع ومش قادرة تتكلم ولا حتى ترد عليه وأنا قلبي وجعني عليها وهي قالتلي أنا هروح عند أهلي أقعد شهر وارجع وأهلها في بلد بعيدة عننا قولتلها لا انتي هتيجي تقعدي عندي في بيتي مع عيالي عشان عيالي بيحبوكي قعدت تعيط بقهرة وتقول انتي الوحيدة اللي حاسة بيا ده أنا ما بيجيليش نوم
ولما قولت لأخويا إنها هتيجي عندي ما كانش راضي وفي الآخر وافق والعروسة الجديدة شرطت عليه شقة معزولة في بيت بعيد عننا مرات أخويا دي بنت أصيلة وصبرت واستحملت لما مكنش لاقي ياكلها وعمرها ما اشتكت ولا طلبت حاجه مننا او من اهلها وكانت صابرة محتسبة بس هو لما ربنا اداله حتى محاولش معاها بالحقن المجهر..ي وقال انا مليش في الحاجات دي وهيتحوز عليها وهي صبرت عليه طول السنين وكانت راضية وساكته عشان شكله قدام الناس انا عايزة بس اعرف هل في حاجه اقدر اعملها ليها غير كده عشان نفسيتها تهدى شوية لاني مش عارفه يوم جوزاه ده هيبقى رد فعلها ايه او ايه اللي هيحصل بس هي هتكون عتدي في البيت ومش هرجعها غير لما الامور تهدا ونحاول معاه يعمل الحقن المجهر.ي ولا نكبر دماغنا