انا مش مريض بس عايش كأني مستني المرض يطلعلي من تحت الأرض، اي وجع بسيط عندي يتحول لكارثة في دماغي، صداع يعني يمكن مصيبة، وجع صدر يعني النهاية قربت، تعب عادي يعني اكيد في حاجة خطيرة، وبفتح النت ادور على الاعراض وبندم بعد دقيقتين لاني بدخل في دوامة اوسخ من الوجع نفسه، اللي حواليا بيقولولي بطل وسوسة بس هما مش فاهمين ان الخوف من المرض ساعات بيبقى مرض لوحده، انا مش بدلع ولا بلفت نظر حد، انا فعلا بتشل من الرعب، بسمع دقات قلبي وبقعد اراقب نفسي كأني دكتور وسجان في نفس الوقت، المشكلة اني عارف اني بأذي نفسي بالتفكير ده بس مش عارف اوقف، كل مرة اقول خلاص هعيش عادي، الاقي جسمي بعتلي احساس صغير فارجع من الاول كأني محبوس في نفس الحلقة.