كاين واحد الإحساس خايب بزاف ما كنقدرش نشرحو مزيان، بحال إلا نتا عايش وسط الناس ولكن ماشي حاضر، كتضحك معاهم وكتجاوب وكتدير راسك لباس، ولكن من الداخل كاين واحد الفراغ كبير، ما هو حزن واضح وما هو فرحة ناقصة، هو بحال شي غرفة مطفية جواك وما عارفش فين السويتش، بزاف ديال المرات كنقول يمكن أنا ما كنعرفش نعيش اللحظة، يمكن كنخرب كل حاجة زوينة قبل ما تكمل، إلا جا شي حد قريب مني كنخاف يتعلق بيا ونخاف أنا نتعلق بيه، وإلا مشى كنقول كنت عارف، حتى الفرح كنستقبلو بحذر بحال ضيف ما غاديش يطول، والمشكل الأكبر أن الناس كتشوفك عادي وكتقول نتا قوي، ولكن القوة اللي بلا راحة كتولي عقاب، كتولي قناع تقيل كتحمله غير باش ما تسولك حتى واحد شنو واقع.