في حاجة غريبة جوايا، أنا بحب الأمل وبخاف منه، بحب فكرة إن بكرة ممكن يبقى أحسن، بس بخاف أصدقها قوي فأتكسر لو ماحصلتش، يمكن عشان كده بقيت أتعامل مع الفرحة بحساب، أفرح شوية وأسيب جزء مني مستعد للخيبة، بس رغم كل ده في حتة صغيرة جوايا لسه مصممة تعيش، لسه لما أشوف حد بيبدأ من جديد بقول يمكن أنا كمان أقدر، لما أعمل حاجة بسيطة صح بحس إن في أمل حتى لو صغير، يمكن الإيجابية مش إنك تبقى مبسوط طول الوقت، يمكن الإيجابية إنك تفضل تحاول وانت مش مقتنع مية بالمية إن المحاولة هتنجح، إنك تقوم من السرير وانت حاسس إنك تقيل، إنك ترد على رسالة وانت نفسك تختفي، إنك تكمل رغم إنك مش شايف آخر الطريق.