بعترف إني عندي فوبيا غريبة من إني أنترك فجأة، مش بس بعلاقة حب، حتى بالصداقة والأهل والناس اللي بتقرب مني، أول ما أحس نبرة حدا تغيرت شوي أو ردّه صار أبرد من العادة بصير عقلي يركض لحاله ويكتب سيناريو كامل إنو خلص زهق مني، خلص اكتشف إني مش كفاية، خلص بده يطلع من حياتي بس مستني فرصة، وبصير أتصرف بطريقة بتخرب كل شي وأنا بحاول أحميه، يا بسأل زيادة وببين مزعج، يا بسكت وببين بارد، يا بعمل حالي مش فارق معي وأنا من جوّا بفور، والمشكلة إني عارف إنو مش كل تأخير بالرد خيانة، ومش كل سكوت انسحاب، ومش كل تعب عند الناس يعني أنا السبب، بس قلبي مش مقتنع، يمكن لأني شفت ناس قبل هيك يروحوا بدون تفسير وتركوني أفتش بالغلط جواتي، من يومها صرت بخاف من البدايات الحلوة أكتر من النهايات، لأن البداية بتخليني أصدق، والتصديق عندي صار مغامرة مرعبة، بحاول أبين قوي وما بدي حدا يحس إني محتاجه، بس الحقيقة إني أحيانًا بتمنى حدا يطمني بدون ما أطلب، يضل ثابت شوي، ما يخليني أحس إني لازم أستحق وجوده كل يوم من جديد.