أنا مش تعبان من الناس، أنا تعبان من نفسي وهي بتفكر زيادة، في لحظات بسيطة المفروض تعدي عادي بس براسي تتحول لتحقيق طويل، كلمة انقالت بنبرة معينة أقعد أحللها، نظرة عابرة أفسرها، سكوت حدا أحوله لرفض، وحتى لما يكون اليوم ماشي منيح بلاقي عقلي يجيبلي ملف قديم ويفتحه غصبن عني، كأني ممنوع أرتاح، كأني لو ارتحت شوي رح تصير مصيبة وأنا مش منتبه، مرات بحس دماغي مش صاحبي، بحسه مدير قاسي فوق راسي بيحسب علي كل رد وكل تصرف وكل احساس، حتى الفرح عندي ما بيجي صافي، بيجي ومعاه خوف صغير بيحكيلي لا تفرح كثير عشان ما تنكسر، وأنا تعبت من الحذر، تعبت أعيش كأني ماشي على زجاج، تعبت أشرح لنفسي إني مش مذنب، وإني ما لازم أكون مثالي، وإني مش مسؤول عن مزاج الكل، بس الكلام الحلو لما يكون جواك خراب ما بيلزق بسهولة، بيمر عليك كأنه نصيحة محفوظة، وأنا بدي يوم واحد بس أصحى فيه وراسي ساكت، قلبي هادي، وما عندي شعور إني لازم أسبق الخيبة قبل ما توصل.