نفسي أفهم ليه الإنسان ساعات يتمسك باللي يوجعه، ليه نرجع نفتّش في محادثات قديمة ونعرف إنها هتتعبنا، ليه نشتاق لناس كانوا سبب إننا نشك في نفسنا، ليه بنحنّ لفترة كانت أصلًا بتكسرنا بس فيها لحظات حلوة كفاية تضحك علينا، أنا مش فاهم قلبي بصراحة، ساعات أحس إنه طفل غبي شايل صورة صغيرة وناسي الحريق كله، يفتكر الضحكة وينسى الإهانة، يفتكر الاهتمام الأول وينسى البرود الطويل، يفتكر وعد واحد وينسى ألف خذلان، وبعدين يطلب مني أرجع أحس نفس الإحساس القديم، بس أنا مش قادر، أنا بقيت أخاف من نفسي لما تشتاق، لأن الشوق عندي مش دليل حب دايمًا، ساعات الشوق إدمان على وجع معروف، على باب اتعودت أخبط عليه حتى لو محدش بيفتح، يمكن النضج الحقيقي مش إنك تبطل تحب، النضج إنك تعرف إن في حب ما ينفعش ترجعله حتى لو قلبك اتحايل عليك، وإن مش كل حنين يستاهل طريق، في حنين لازم يتحط في مكانه ويتساب يموت لوحده.