سؤال من مجهول: ليش الواحد مرات بظل متعلق بحد هو عارف انو وجعه؟ يعني انا فاهم كل شي، فاهم انو وجوده بحياتي تعبني، فاهم اني صرت اراقب ردوده واختفي لما يبرد واقرب لما يحن، فاهم اني خسرت كرامتي شوي شوي وانا بحاول افهم ليش تغير، بس رغم كل هاد في جزء غبي مني بضل يستنى رسالة منه، بضل يفتش عن عذر، بضل يقول يمكن كان مضغوط، يمكن انا بالغت، يمكن لو حكيت بطريقة ثانية كان فهمني، مع ان الحقيقة قدامي واضحة زي الشمس، الشخص اللي بدو وجودك ما بخليك تتسول وضوح، وما بخليك تنام كل ليلة وانت بتفكر انت غلطت ولا هو قاسي، بس المشكلة مش بالعقل، العقل حافظ الدرس، المشكلة بالقلب اللي لساتو متعلق بلحظات قليلة حلوة وناسي الكسر الطويل، كيف الواحد يوقف يحن لناس ما رجعوه مثل ما كان؟ كيف الواحد يقنع قلبه انو الاشتياق مش دايما دليل حب، مرات الاشتياق بيكون ادمان على وجع متعود عليه، ومرات بنضل نحب الباب اللي انقفل مش لأنو كان أمان، بس لأننا تعبنا واحنا نطرق عليه.