استفسار من مجهول: هل طبيعي الواحد يكون تعبان من اهله وهو بنفس الوقت بحبهم؟ انا مش ناكر خيرهم ولا بدي اطلع عاق ولا قليل اصل، بس في بيوت بتعطيك اكل وسقف واسم عيلة، وبنفس الوقت بتاخد منك صوتك وراحتك وثقتك بنفسك، في ناس بيعتبرو السيطرة خوف عليك، وبيعتبرو النقد تربية، وبيعتبرو المقارنة تحفيز، وبيعتبرو السكوت احترام، وانت تكبر وانت مش عارف انت بتحبهم ولا بس خايف تزعلهم، مش عارف قراراتك الك ولا الهم، حتى لما تفرح بإنجاز بتستنى رأيهم، ولما تفشل بتحس انك فضحتهم، انا تعبت من الاحساس ان حياتي مش حياتي، تعبت من اني لازم ابرر كل رغبة وكل رفض وكل اختيار، وبنفس الوقت بتوجع من نفسي لما ازعل منهم، بحس بالذنب بسرعة، بحس اني سيء، بس هل الحب يعني اني اقبل اني انمسح؟ هل البر يعني اني اعيش نسخة هما اختاروها؟ انا بدي احبهم واحب حالي بنفس الوقت، بس شكلو هاد اصعب توازن بالدنيا.