كاين واحد الشعور كيقتلني بشوية بشوية، هو انك تكون وسط الناس وكلشي كيبان مزيان ولكن نتا من الداخل غايب، كتضحك وتهضر وتجاوب وتبان طبيعي، ولكن فالحقيقة راسك فبلاصة بعيدة، كتسول راسك واش هادي هي الحياة؟ واش غير هكا غادي نبقاو؟ نخدمو ونتعبو ونكمشو قلبنا ونقولو الحمد لله وكل واحد فينا كيدفن شي حاجة ما قدرش يهضر عليها؟ مرات كنحس براسي كنمثل دور انسان مستقر، كنلبس وجه مناسب لكل موقف، وجه فالخدمة، وجه فالدار، وجه مع الصحاب، ووجه اخر ملي كنكون بوحدي، وداك الوجه الاخير هو الحقيقي وهو اللي ما كيبغيش يهضر مع حتى واحد، كنخاف نقول للناس راني خاوي من الداخل ويقولو ليا بالغتي، كنخاف نشرح وما نفهمش حتى انا شنو واقع، ماشي اكتئاب واضح وماشي حزن مفهوم، غير بحال شي ضباب، كلشي باين ولكن ما كاين حتى اتجاه، وبغيت غير نهار واحد نحس فيه اني حاضر، ماشي غير كنقضي نهاري ونسميه حياة.