بدي احكي اشي فيه شوية نور بدون ما اكذب على العتمة، انا مرقت بفترات حسيت فيها اني خلصت، انو ما في نسخة مني راح ترجع، انو اللي انكسر انكسر نهائي، بس مع الوقت اكتشفت ان الانسان غريب، ممكن يتهشم ويرجع يلم حاله ببطء، مش بنفس الشكل يمكن، بس يرجع، ممكن يوم كامل يكون سيء وبالاخر تنقذك اغنية، رسالة، شمس داخلة من الشباك، قهوة، مشوار قصير، كلمة طيبة من شخص عابر، ممكن ما يصير كل شي منيح فجأة، بس تصير في لحظة صغيرة تخليك تقول يمكن اكمل يوم كمان، وهاي اللحظات الصغيرة ما لازم نستهين فيها، احيانا النجاة مش قرار ضخم، النجاة انك تقوم من التخت وانت مش حابب، انك تاكل لقمة وانت مسدودة نفسك، انك ترد على حدا بدل ما تختفي، انك تقول لا لمكان كان يستنزفك، انك توقف لوم لنفسك ولو دقيقة، انا لسا بخاف ولسا بشك ولسا بتعب، بس صرت افهم اني مش لازم اكون بخير كامل عشان اكون ماشي بالطريق الصح، يكفي اني ما سلمت حالي لكل شي حاول يطفيني.