سؤال من مجهول: ليه في ناس بتفضل عايشة جوه علاقة أو مكان أو بيت بيكسرها وهي عارفة إن ده بيكسرها؟ أنا بسأل عشان أنا نفس الشخص ده، عارف إن وجودي في مكان معين بيخليني أصغر، عارف إن في ناس حواليا بيمتصوا طاقتي وبيرجعوني لنقطة الصفر، عارف إن كل مرة بقول دي آخر مرة وبرجع أتنازل، ومع ذلك مش بعرف أمشي، يمكن الخوف من الوحدة أقوى من وجع الإهانة، ويمكن الإنسان ساعات بيتعود على الوجع لدرجة يبقى الخروج منه مرعب، أنا بقيت أخاف من الراحة لأنها جديدة عليا، أخاف من الهدوء لأنه مش مألوف، أخاف أسيب الحاجة اللي بتوجعني وبعدين أكتشف إني مش عارف أعيش من غيرها، وده أكتر اعتراف مخزي بالنسبة لي، إن الواحد ممكن يبقى فاهم كل حاجة بعقله وقلبه لسه واقف عند باب مقفول، مستني اعتذار مش هييجي، مستني تقدير من ناس شايفينه مضمون، مستني لحظة يثبت فيها إن صبره ماكانش غباء، بس اللي بيحصل إن العمر بيمشي، والكرامة بتتآكل حتة حتة، والواحد يصحى بعد سنين يلاقي نفسه خسر كتير وهو بيحاول ما يخسرش حد.