كنحس براسي تبدلت من بعد واحد الصدمة ماشي لأنها كانت كبيرة فعيون الناس، ولكن حيث جات من بلاصة كنت حاسبها آمنة، كاينين ناس ملي كيجرحوك كتقول عادي كنت متوقع، ولكن ملي يجيك الوجع من واحد كنت كتهرب ليه من الدنيا، هنا كتولي ما عارفش فين تمشي، أنا ما بكيتش بزاف وقتها، بالعكس بقيت ساكت وبارد وكنقول مزيان، ولكن من داك النهار شي حاجة فيا طفات، وليت كنضحك بحساب، كنقرب بحساب، كنقول الكلام بحساب، حتى العفوية ديالي ولات خايفة، وهاد الشي كيقتلني، حيت الناس كتشوفك تبدل وكتحكم عليك، كيقولو وليتي قاسي، وليتي بعيد، وليتي ما بحالكش، ولكن ما كيسولوش شكون خلاك هكا، ما كيعرفوش أن الواحد ما كيبردش من فراغ، كاينين مواقف كتسحب منك الثقة بشوية، وكاينين كلمات كتدخل فالقلب وما كتخرجش، وكاينين وعود ملي كتتكسر ما كتكسرش العلاقة بوحدها، كتكسرك نتا معاها، وأنا اليوم ماشي باغي ننتاقم ولا نرد الأذى، غير باغي نفهم كيفاش نرجع نعيش بلا ما نبقى نشوف الخيانة فكل وجه والرحيل فكل خطوة.