في شعور غريب بحسّه لما أكون بين الناس، كأن الكل عارف يعيش إلا أنا، الكل ماشي بخطة أو حتى عامل حاله ماشي بخطة، وأنا واقف من جوا مش فاهم وين بدي أروح، بشتغل وبضحك وبرد على الرسائل وبعمل اللي علي، بس في جزء مني بيسأل كل يوم: هل هاي هي الحياة؟ نصحى ونركض ونتعب ونخبي الوجع وننام ونرجع نعيد نفس اليوم؟

يمكن المشكلة مش بالحياة، يمكن المشكلة إني استنزفت حالي وأنا أحاول أكون النسخة المطلوبة من كل جهة، قدام أهلي شخص، قدام أصحابي شخص، قدام الشغل شخص، وقدام نفسي شخص ما بعرف أتحمله، صرت أشتاق لحالي وأنا ما عمري عرفت مين أنا بالضبط، أشتاق لخفة ما عشتها،

لهدوء ما جربته، لشعور إني موجود مش بس شغال على البقاء، أحيانًا بحس إن أكبر حلم عندي مش فلوس ولا نجاح ولا شهرة، بس يوم عادي أكون فيه مرتاح من جوا، ما عندي معركة مع حدا، ولا مع نفسي، ولا مع بكرا، يوم أحس فيه إن قلبي مش مشدود كإنه مستني ضربة.