اعتراف من مجهول: أنا بخاف من الزواج مش لأني ضدّه ولا لأني ما بدي بيت واستقرار، بالعكس يمكن من كثر ما بدي، بخاف، بخاف أختار غلط وتطلع الحياة كلها مجاملة طويلة، بخاف أعيش مع شخص طيب قدام الناس وقاسي بين الجدران، بخاف أصير نسخة من ناس شفتهم ساكتين سنين عشان الصورة، بخاف أدخل بيت وأنا أحمل أحلام وبعدين أكتشف إن الحلم كان ديكور، بخاف من التفاصيل الصغيرة اللي ما بتبين بالخطبة ولا بالكلام الحلو، طريقة الزعل، طريقة الاعتذار، احترام الخصوصية، التعامل مع المصاري، مع الأهل، مع التعب، مع المرض، مع الأيام اللي ما فيها مكياج ولا ترتيب ولا رومانسية، بخاف من شخص يحبني لما أكون خفيفه عليه ويكرهني لما أصير مسؤولية، وبنفس الوقت بخاف أضل أرفض وأحلل وأدقق لحد ما تضيع مني فرصة حقيقية، الناس بتحكي النصيب، بس النصيب ما بمنع الخوف، خصوصًا لما تكون شايف حواليك بيوت كثيرة واقفة من بره ومهدودة من جوه، وأنا مش بدي زواج للناس ولا للصورة ولا عشان العمر ما يمشي، بدي أمان، بدي شخص لما يختلف معي ما يهينني، لما يزعل ما يكسرني، لما يعرف ضعفي ما يستخدمه، لما يدخل حياتي ما يخليني أندم إني فتحت الباب، يمكن طلبي بسيط بالكلام وصعب بالواقع، عشان هيك بخاف، لأن الغلط هون مش موقف وبيعدي، الغلط ممكن يصير عمر كامل بتقضيه جنب شخص وتضل حاسس بالوحدة أكتر من لو كنت لحالك.