أنا صرت أؤمن إن الواحد ممكن يتغير بدون ما يصير نسخة مثالية، يعني مش لازم أصحى فجأة إنسان مرتب وقوي ومتزن وبعرف شو بده، يمكن التغيير يكون أبطأ وأبسط وأصدق من هيك، يمكن يكون إني بطلت أرد على كل استفزاز، أو صرت أميز مين يستاهل شرحي ومين لا، أو صرت أقول “مش قادر” بدون ما أحس إني خسرت قيمتي، أو صرت أسمح لنفسي أرتاح ساعة بدون ما أعتبرها كسل، أو صرت أفرح لشي صغير بدون ما أستحي من بساطته، زمان كنت أستنى حدث كبير يثبت إني تعافيت، هسه صرت أشوف التعافي بتفاصيل ما حد بينتبهلها، إنك تمر بيوم صعب وما تأذي حالك بكلام قاسي، إنك تسمع خبر يضايقك وما تنهار مثل قبل، إنك تشوف اللي تركك وما ترجع لنفس الدوامة، إنك تعتذر لنفسك عن سنين جلدتها فيها، إنك توقف تقارن حزنك بحزن غيرك وتقول وجعي مهم حتى لو في ناس موجوعة أكثر، يمكن الحياة ما رح تصير سهلة فجأة، ويمكن في أيام رح نرجع نتعب ونخاف ونشك، بس في فرق بين شخص يغرق وما بعرف يسبح، وشخص تعب وهو عم يتعلم يطفو، وأنا يمكن لسا ما وصلت للشط، بس على الأقل بطلت أترك نفسي تنزل للقاع كل مرة، وهذا بالنسبة إلي مش كلام تحفيزي فارغ، هذا انتصار صغير بس حقيقي، انتصار ما عليه تصفيق ولا صور ولا ناس تعرفه، بس أنا بعرفه، ومرات يكفي إنك انت تعرف إنك قاومت بصمت وضلّ فيك جزء مصرّ يعيش.