سؤال محيرني من زمان: ليه في ناس بتخاف من انها تكون محبوبة بجد؟ أنا طول عمري كنت فاكر إني ناقص حب، بس لما الاقي حد قريب مني بصدق، حد مهتم، حد بيسأل، حد بيحاول يفهمني، بدل ما أرتاح بتوتر، كأني مش مصدق إن في حد ممكن يختارني من غير مصلحة أو شفقة أو وقت فراغ، ببقى عايز أصدق وبنفس الوقت أعمل اختبارات غبية، أبعد أشوف هيدور عليا ولا لأ، أسكت أشوف هيسأل ولا لأ، أقلل كلام أشوف هيلاحظ ولا لأ، وبعدين أزعل من نفسي لأني بحول الحب لامتحان، يمكن عشان اتعودت إن أي اهتمام كان وراه تمن، إما لازم أكون مثالي، أو لازم أرضي، أو لازم أتنازل، فبقيت لما حد يحبني بهدوء أحس إن في حاجة غلط، أقول أكيد ما يعرفنيش كفاية، أكيد لو شاف خوفي وعنادي وتقلبي هيبعد، فبدل ما أسيبه يشوفني، ألبس وش كويس لحد ما أتعب، أو أهرب قبل ما يكتشفني، والمضحك المبكي إني طول الوقت بشتكي إني محتاج حد يطمنني، ولما الطمأنينة تيجي فعلاً ما بعرفش أستقبلها، بحس إني واقف قدام باب مفتوح بس رجلي مش قادرة تدخل، خايف من البيت اللي جواه أمان لأني اتعودت على الشارع، وده وجع غريب، إنك تكون بتدور على الشيء نفسه اللي أول ما يقترب منك ترتعب منه، بس في الاخر بديت أفهم إن المشكلة مش في الناس اللي بتحبني، المشكلة في الجزء اللي جوايا لسه مقتنع إنه لازم يتعب عشان يستاهل الحب.