من فترة طويلة وأنا حاسس إني بمثل شخصية مو شخصيتي، قدام أهلي أنا القوي اللي ما يحتاج حدا، قدام أصحابي أنا الخفيف اللي يمزح بكل شي، بالشغل أنا المرتب اللي دايمًا عنده حل، ولما أرجع لحالي بحس إني ما بعرف مين الشخص الحقيقي بين كل هدول، المشكلة إني بنيت صورتي عند الناس بطريقة ما عاد فيني أطلع منها، إذا حكيت إني تعبان بستغربوا، إذا اعتذرت عن طلعة بيقولوا شو صاير معك، وإذا طلبت مساعدة بحسسوني إن الجبل نفسه قرر يشتكي، وأنا بصراحة ساهمت بهالشي لأني طول عمري كنت أخاف حدا يشوفني ضعيف، كنت مفكر إن الناس بتحترمك بس لما تكون ما بتنكسر، وبعدين اكتشفت إنك لما تضل مخبي كل كسر جواتك بتصير غريب حتى عن حالك، مرات بقعد بالسيارة قبل ما أفوت عالبيت نص ساعة بدون موسيقى وبدون تلفون، بس أطلع لقدام وأحاول أستوعب ليش نفسي ثقيل لهالدرجة، وليش كل كلمة بسيطة بتوجعني وأنا بضحك عليها، وليش ما عندي شخص واحد أقدر أحكيله إني مش بخير بدون ما أحس إني عم بحمله فوق طاقته، يمكن أنا مش محتاج نصيحة ولا حل ولا محاضرة عن الإيجابية، يمكن بس محتاج حدا يصدق إن الشخص اللي بضحك طول الوقت ممكن يكون أكثر واحد مستنزف، واللي بقهر إني حتى وأنا بكتب هالحكي حاسس إني لازم أخففه بنكتة عشان ما أبان درامي، كأني صرت أستحي من مشاعري أكتر ما بستحي من أخطائي.